زي ما هو واضح في العنوان بالفعل Destiny هيكون ليها Microtransaction و من خلالها هيتم بيع Emots في اللعبة.
الـMicrotransactions هتكون متوفرة من يوم 13 اكتوبر و هيتوفر حوالي 18 Emots بمشاعر مختلفة شخصيتك في اللعبة ممكن تعبر عنهم بيها و تم التأكيد علي انهم اختياريين بنسبة 100% و مش هيكون بسببهم منع للوصول لاي محتوي في اللعبة موجود حاليا او هيتم اضافته في المستقبل.
و Bungie وضحوا اكتر السبب ورا القرار دا و هو توفيردعم مادي للعبة بشكل اكبر و انتاج محتويات و تجارب جديدة و تحقيق طلبات اللاعبين بشكل اكبر مع الوقت و دا النظام اللي هيتم اتباعه في Destiny 2.
فيما معناه Bungie عاوزين يتبعو نظام جديد المفروض كان متبع في لعبة زي Guild Wars 2 مع نزولها بعدم توفير اي اشتراكات شهرية او محتويات مدفوعة و تقديم المحتويات دي بشكل مجاني و دعمها من خلال Microtransactions ملهاش تأثير علي تجربة اللعبة و مش هتكون عائق للوصول لاي محتوي جديد.
في رايي الشخصي الموضوع دا ان كان تم اتباعه مع الجزء الجديد من اللعبة فا دي فكرة كويسة تضمن عدم قسم مجتمع اللعبة لجزئين سواء دافع تمن محتوي اضافي و جزء لا.
انما مع الجزء الحالي الموضوع ممكن البعض يعترض عليه فعلا لان اللعبة حاليا عشان اي حد ياخد التجربة الكاملة خصوصا لو كان اشتراها من اول يوم في سبتمبر 2014 اضطر يدفع اكتر من 60 دولار مقابل اللعبة.
عموما السياسة الجديدة دي هنشوف هيكون وضعها ايه مع تنفيذها في الايام اللي جاية.
