أخبار و مراجعات ألعاب الفيديو

, / 392

مراجعة FIFA 17

Football, Powered by Frostbite!
SHARE

على مر السنين, دائما في جدل ما بين FIFA و PES و مين أحسن و بيقدم روح أقرب للواقع, و تركيز FIFA السنة ديه كله على الواقعية, الدراما والسيطرة على أبسط التفاصيل في المباريات; كأنك بتتفرج على مباراة بس معاك Controller في ايدك. وده كله عن طريق استخدام Engine جديد, احنا مش متعودين على اسمه في عالم الألعاب الرياضية وهو Frostbite, و EA قررت استغلال Frostbite من أجل تقديم طبقة جديدة لواقعية اللعبة.

FIFA بالنسبة ليَّ هي أكتر قرار مريح ومناسب بخده كل سنة لما بقرر إيه اللعبة الرياضية اللي هشتريها. ده بسبب طريقة عرض اللعبة للمباراة, والأهم حقوق وتراخيص النوادي, المنتخبات والدوريات والأهم أهم هو التنوع في اللعبة. بالأضافة لـThe Journey اللي يعتبر مفاجأة FIFA السنة ديه, في دايما تنوع في FIFA من ناحية الـGame modes, مثلا الـCareer Mode كويس جدا و طبعا Ultimate Team و الـSeasons. كل ده بيوصل إنك ممكن تقفل 50 ساعة في اللعبة بتجرب كل الحاجات ديه.

تغيرات اللعبة السنة ديه في Gameplay مش بالضخمة جدا ولكن أفضل بكتير من السنة اللي فاتت و قامت بتعديل وتظبيط حاجات كتير كان نفسي تتعدل من FIFA 14. أكبر تغير العام ده هو تنفيذ الركلات الحرة – Free-Kicks, Penalties, Corners, و Throw-ins – في التنفيذ ذات نفسه الموضع بقى مفتوح للـ لاعب انه يتحكم تحكم كامل بحركة اللاعب قبل ركل الكرة وعلى قد ما في جدل في الموضوع ده وبسبب الـPenalties بالذات ولكن الموضوع بالنسبة لي ممتاز جدا, واقعي جدا و بيدي حرية كاملة في التنفيذ على عكس أي جزء سابق أو أي لعبة كرة لعبتها في حياتي.

أفضل اضافة ليَّ في الـGameplay السنة ديه هو الـPhysical Play واخيرا اللاعب اللي بيتحكم بالكرة ممكن يرد الضغط على المدافع ويبقى Physical معاه وده بيفتح فرص جديدة للاستحواذ على الكرة تحت الضغط و فتح مساحات. كل ده بيضاف ليه أساليب هجوم جديدة بتقرب اللعبة للواقع بشكل ضخم.

physicalplay-360shielddribble-md-2x

من الاضافات الجديدة اللطيفة جدا هي multiplayer skill games, وجود حاجة زي مباراة صغيرة مكونة من 2vs2 و تحديات أخرى بتخلي انتظار بداية المباراة مسلي جدا وممكن إنت واللي بتلعب معاه تسرحوا و تفضلوا تلعبوا Skill Games و تنسوا إن في مباراة مفروض تلعبوها أصلا. و أيضًا الموضوع ده بيخلي الواحد يفكر في اشاعة عن احتمالية وجود 5-a-side mode/خماسي في FIFA وإزاي الموضوع هيبقى ممتع جدا لو إتعمل.

أيضًا Career Mode بيحصل على تحسينات جيدة اخيرا, أدارة الفريق أصبحت أدق, وتم تقسيم نجاحك في النادي لكذا نقطة, واحد نجاح محلي, اتنين نجاح قاري, تلاتة قيمة العلامة الخاصة بالنادي, تمويل النادي, و تطوير الشباب. طبعا متطلبات كل نادي بتختلف, لو اختارت نادي زي ريال مدريد هيبقى مطالب منك النجاح في المحلي والقاري ورفع قيمة النادي على عكس أدارة نادي زي وست هام اللي هيبقى مطالب منك حاجات بسيطة بتسمح إنك تاخد وقتك في النادي عشان تطوره.

FIFA 17 Career (In Menus)

FIFA 17 Career (In Menus)

FIFA 17 Career (In Menus)

الـUltimate Team مازال أضخم حاجة في FIFA كلعادة, والسنة ديه EA قررت تضيف حاجة مختلفة شوية عن إنك تلعب مباريات وتتاجر في لاعبين وتفتح Packs, الجديد هنا هو تحديات كل فترة عبارة عن متطلبات معينة تبني بيها فرقة من الحاجات اللي معاك ولو قدرت تكسب التحدي هتحصل على مكافآت, الموضوع كويس وهيخليك تستخدم مصادر عندك مكنش بيبقى ليها أي لازمة.

نيجي لأكتر نقطة بتميز FIFA وهو عرض المباراة بكل تفاصيلها, كل سنة FIFA بتضيف تفاصيل بسيطة ولكن بتفرق, مثلا السنة ديه بنشوف اضافة حكام حقيقين من الدوري الانجليزي للعبة وايضا لو لاعب جاب Hattrick بياخد كرة المباراة من الحكم بعد انتهاء المباراة. أكبر تغير ملحوظ في FIFA السنة ديه هي اضاءة اللعبة و Models اللاعبين. الاضاءة في اللعبة تعتبر من أفضل ما شوفت وعلى نفس مستوى NBA 2K17 و أعلى في بعض الملاعب زي الـStamford Bridge و الـAllianz Arena اللي شكلهم فعلا رائع جدا. ده ميمنعش وجود مشاكل في حاجات زي الغرف في The Journey اللي شكلها ممل جدا و مش مهتم بيها خالص ومفهاش تفاصيل كتير و أيضًا الـAnti-Aliasing السيء جدا في Cut-Scenes اللي بتمنى انه يتحسن السنة القادمة عشان ساعات بيفصل جدا.

stamford-bridge-fifa-17allianz-md

شكل اللاعبين من الجسد للوجه ممتاز السنة ديه أيضًا و على نفس مستوى NBA 2K17, الـModels نفسها شكلها واقعي جدا, واضافة مدربي الدوري الأنجليزي الممتاز كلهم غير شكلهم الرائع, بيضيفوا على عرض المباراة و بيقرب جدا للواقع.

full-and-close-up-fifa-17-models

klopp

مفاجأة السنة ديه كانت The Journey Mode حاجة لأول مرة بنشوفها في FIFA وهي Story Mode عن Alex Hunter الموهوب بالفطرة اللي بيحارب عشان يبقى ليه اسم في دوري الانجليزي.

ckx_rfuwkaq0mpk

الـMode مبني في الأساس على الدراما اللي حول عالم كرة القدم, و تفاعل اللاعب مع القصة عن طريق اختيارات في الحوار متاحة للـ لاعب *زي لعبة The Walking Dead أو Life is Strange مثلا* ولكن محدودة شوية و Cut-scenes دورها هو مزج اللاعب مع القصة وعرض تطوير الشخصيات بالذات اللي بيحصل مع Alex واصدقائه وعائلته و هل هو قد انه يبقى من أفضل لاعبي الدوري الانجليزي ولا لأ. رفع مستوى Alex في اللعبة بيعتمد على الحصول على Upgrade Points عشان تستغلهم في Skills معينة عشان تعدل على طريقة Alex بالشكل اللي إنت تحبه, و بتحقيق أعلى Scores ممكنة في التمرينات مش بس عشان تبهر المدرب وتحافظ على مكانك في التشكيلة, عشان تحسن من مستوى Alex وتوصل لأعلى مستوى ممكن ليه.

The Journey بتقدم الدراما بشكل رائع. خلال اللعبة إنت بتبني شخصية Alex بـ اختياراتك خلال الحوار مع الشخصيات الأخرى, للأسف الأختيارات محدودة ومش زي لعب الـRPG الضخمة و مبنية على ثلاثة حاجات فقط وهي ‘fiery,’ ‘cool,’ و ‘neutral’.

fifa-17-journey-dialogue-capالتلاتة دول هم اختياراتك خلال المحادثات مع الشخصيات أو في المقابلات و بيبني شخصية Alex على نقطتيتن وهم يا Alex هيبقى Fiery يا Cool وعلى قد ما الموضوع محدود, بيفرق جدا أنت هتعمل إيه وقراراتك هتبقى إزاي وهتوصل لأيه مع المدرب و الحصول على راعي ليك زي Adidas مثلا.  بس للأسف في نقط خطية جدا في القصة بتأثر على نمط الـMode و بتحصل مهما إنت عملت 

SPOILER ALERT

أيضًا من الحاجات اللي ساعات بتبقى غير موزونة خالص هي متطلبات المدرب الاضافية لما تنزل مثلا في دقيقة 75, ساعات بتبقى مستحيلة جدا مش بسبب الوقت بس, لأ بسبب مركزك في المباراة; على سبيل المثال أنا بلعب CAM و كنت مختار Chelsea, و أنزل في تغير بدل Fabregas و ألعب LCM ورا الـCAM  على خط النصف بالظبط و مطلوب مني اجيب الهدف التالي و أحقق مكسب للفريق, الموضوع ممكن يبقى سهل لو بتلعب على Difficulty سهلة, ولكن لو على Professional و إنت طالع ممكن يبقى مستحل لأن أولا بتلعب في مركز غير مركزك  و المركز اللي إنت فيه هدفه هو صناعة الهجمة. أيضًا نظام التقيم في اللعبة في بعض الأحيان غير منطقي ممكن تخسر نقط بسبب إن في كورة إنت قمت بتسديدها بشكل ممتاز ولكن مدافع طلعها بتلاقي اللعبة بتقولك إنها تسديدة سيئة  إن الكورة تتقطع منك ولكن لو استرجعتها في نفس اللحظة مش هتحصل على نفس النقط اللي خسرتها لما خسرت الكورة لثانية ولا اتنين. ده أيضًا غير إنك ممكن تخسر عقدك مع الفريق و اللعبة تخلص لو عملت مشكلة صغيرة على عكس مستواك المبهر طول الموسم وده شئ كنت بجربه و كان مستفز جدا إن حاجة زي كده تحصل كان ممكن مثلا إنك تطلع على الـTransfer-List أو يتم معاقبتك بسحب فلوس ومنعك من اللعب لفترة. وأيضًا ممكن إنك تجيب Goal في نفسك و يتم طردك في Debut بتاعتك و تروح تعمل المقابلة و تتكلم إنك لو كنت لعبت من بدري كان زمانك عملت فرق و الصحفية عاملة نفسها من بنها تقريبا ومش أخده بالها إنك مطرود و جايب جول في نفسك!

ولكن احقاقا للحق الـCut-Scenes بتعوض جدا لانها فعلا بتقدر إنها تستحوذ على أحساس اللاعب الناشئ في الحقيقية و تقدمه ليك مع العلم إن تقيم اللعبة PEGI ولكن في مشهد في الـDebut الخاصة بيك وكل الجماهير بتهتف وتقول “who are ya؟” بيديك أحساس بـ اللي أي لاعب ناشيء بيحس بيه في أول مباراة ليه في أي فريق مهما كان.

ده غير متعة إنك تبقى بتتمرن مع لاعبين من انديتك المفضلة و تبقى بجانبهم في غرفة تغير الملابس, وتقابل لاعب زي Reus ويبقى عارف اسمك وكده الموضوع صراحة مسلي وعاطفي  جدا. الموسيقى التصويرية أيضًا ممتازة والشكر Atticus Ross ملحن The Girl with the Dragon Tattoo و Gone Girl, اللي قدم مزيكا Ambient ممتازة بتلائم جو الدراما الخاص بـThe Journey.

FIFA استطاعت إنها تحافظ على نجاحها خلال السنين اللي فاتوا عن طريق المحافظة على التوازن الخاص باللعبة و عدم صناعة تغيرات ضخمة في اللعبة, ولكن تغير Engine اللعبة من Ignite لـFrostbite هو شيء أنا شايفه ضخم جدا, ممكن مفيش تغيرات ثورية في Gameplay اللعبة, ولكن التغير ده هيفرق في السنينyegy menaha copy القادمة لو تم استغلال قدرات Frostbite صح. FIFA من ناحية Gameplay وبالذات في التمريرات وصناعة الهجمة مش أحسن من PES, ولكن أنا حاليا بمتلك الاتنين وبلعب FIFA أكتر مش عشان معظم صحابي عندهم FIFA, ده بسبب إن FIFA بتقدم الـFull Package من ناحية الـModes وعرض المباراة المبهر و حقوق الأندية و المنتخبات. ولكن امنيتي الوحيدة حاليا هي استغلال Frostbite و تحسين الـAnti-Aliasing وتقديمه على نفس مستوى Battlefield 1. والتركيز على الأساسيات في Gameplay زي التمرير و التنوع في الـAnimations حاجات PES متفوقة جدا فيها و بتفرق جدا بسبب إنها مجرد BASICS.

أيضًا The Journey كانت ممتعة جدا ببعض العيوب, بس صراحة أنا مستني جدا إيه اللي EA Sports هتعمله السنة القادمة.