Titanfall. سمعنا كلام كتير عن اللعبة في الفترة اللي فاتت من مجرد بيتا و ناس كتير حست ان اللعبة واخدة اكتر من حقها. صحيح ان يمكن البيتا اللي لعبناها كانت من اكتر بيتا استمتعنا بيها و كانت ثابتة و متوازنة بشكل كبير, بس بعد تجربة اللعبة الكاملة منقدرش نكتفي بالحكم عليها من بيتا قدمت محتويات محدودة شوية و البيتا يمكن بتمثل 5% من محتوي اللعبة الكاملة.
بس قبل ما نتكلم عن اللعبة تعالو نرجع كام سنة لورا لسنة 2002. اللي نزلت فيها لعبة اسمها Medal of Honor Allied Assault اشتغل عليه ستيديو اسمه 2015 inc. اسسه اتنين مطورين و هما Vince Zampella و Jason West.
اللعبة وقتها قدمت قصة و Campaign كان ممتاز و اتوصف كتير بانه اقرب لمستوي فيلم Saving Private Ryan لستيفن سبيلبيرج , و مالتي بلاير اعتقد انا مش محتاج اتكلم عنه كتير و عن حالة الادمان اللي معظمنا دخل فيها بسببه.
في 2003, Vince Zampella و Jason West اشتغلو علي سلسلة جديدة تماما و هي Call of Duty, يمكن معظم الناس وقتها شافت ان اول جزء من Call of Duty كان عبارة Medal of Honor بس اتضافلهاAim Down Sights. بس Call of Duty 4 او Modern Warfare تاثير Call of Duty الواضح علي Multiplayer Shooters ظهر ,اللعبة يمكن عملت ضجة من خلال تقديم افكار زي Loadouts و الـPerks و الـKill Streaks, و الافكار دي اثرت علي تفكير كل مطور بيجي يعمل Multiplayer Shooters.
Vince Zampella و Jason West مشيو تماما من الاستيديو اللي اسسوه بنفسهم و هو Infinity Ward بعد لما عملوا 2 Modern Warfare, و الاسباب كانت اسباب مالية تقريبا و من بعدها سلسلة زي Call of Duty وقعت في مشكل التكرار و عدم تقديم اي جديد. الاتنين اسسوا ستيديو جديد و هو Respawn Entertainment اللي قدم لعبة زي Titanfall.
السؤال Vince Zampella و Jason West او Respawn Entertainment بعد ما علي مدار 12 من خلال ميدل Medal of Honor و Call of Duty قدمو افكار مختلفة و جديدة لفكرة الـMultiplayer Shooters, هل الكلام ده هنشوفه تاني مع Titanfall؟ خصوصا ان للاسف الـMultiplayer Shooters في الفترة الاخيرة بدات تعاني من قلة الافكار الجديدة.
Gameplay:
هتستغربو شوية لما تلاقوني ابتديت في الكلام بالGameplay لان بالفعل Titanfall تقريبا مفهاش اي نوع من انواع القصة اساسا. بس دي حاجة عاوز اتكلم عنها الاول و ليها علاقة شوية بالGameplay.
اللعبة فيها حاجة اسمها Multiplayer Campaign بيدخلك في كذا ماتش في كذا Game Mode من اللي موجودين في اللعبة زي Attrition و Hard Point علي مدار 9 مهمات او بالمعني الاصح 9 ماتشات في 9 خرايط من ال 15 خريطة في اللعبة.
في خلال الـMultiplayer Campaign دا انت مجرد بتشوف عرض لصراع بين جانبين و هم الميليشات و شركة IMC. و تقريبا العرض هنا ممكن يكون متواضع شوية و مش بالشكل اللي بنشوفه في لعب تانية. طب هل دا عيب ولا لأ في اللعبة؟
شخصيا مقدرش اقول انه عيب لسبب لاني بمتابعتي للحملة الدعائية بتاعت اللعبة عرفت ان Respawn Entertainment ستيديو مكون من 70 مطور قرروت انهم يركزو بس علي عناصر اللعب الجماعي بس, و معندهمش الموارد و الافكار اللي تخليهم Campaign بقصةزي لعب تانية. او ممكن لو عمله يطلع Campaign مضيعة وقت.
فا اتبعو نفس الطريقة بتاعت Unreal Tournament في عرض احداث بسيطة جدا وسط اونلاين ماتش عادي جدا بتلعبه مع اي حد. بس شخصيا في وسط الاحداث اللي بتتعرض دي اعتقد ان كان في امكانية انك تعمل Campaign حلو شوية و يمكن الفرصة دي تبقي متحة الاجزاء اللي جاية لو الاستيديو عدد الموظفين فيه كبر.
شخصيا لقيت ان في حالة فضول عندي اني عاوز اعرف اكتر عن الكائنات الفضائية الموجودة في اللعبة دي, و عاوز اعرف عن ايه اسباب الصراع بين الميليشيات و الاي ام سي و سبب ان شخص زي ماكلين انشق عن عن الاي ام سي و انضم للميليشيا. و كان في تقديم حلو لمهمة اسمها Battle of Demeter فكرني بتقديم مهمة اسمها Omaha Beach في Medal of Honor Allied Assault. في عناصر هنا ممكن يتبني عليها قصة ظريفة من وجهه نظري بس يظهر ان Respawn Entertainment تفادوا انهم يعملو حاجة تبقي محبطة.
مش عاوزين نتكلم عن الموضوع ده كتير و نتكلم بقي اكتر عن الجيمبلاي بتاع اللعبة. الجيمبلاي اللي يخص Titanfall بصراحة مليان بكم كبير جدا من المتعة و الادمان اللي مشفتش زيه من فترة طويلة, من ساعة البيتا اللي قضينا عليها 20 ساعة لعب اعتقد ان حاجة زي دي واضحة جدا.
اللعبة مقسومة علي جانبين في الجيمبلاي و هما انك تلعب علي رجلك او دا الـPilot Gameplay او تلعب بالـTitans.
لما تيجي تلعب علي رجلك بقي اول حاجة بتتعامل معاها طريقة ضرب النار. الحاجة الوحيدة اللي ممكن نقول انها اقرب لـCall of Duty بسبب انها تقريبا واخدة نفس فكرة ان الاسلحة الـ recoil بتاعها مش واقعي و سهل جدا تتحكم فيه.
الفكرة ان اساس الـPilot Gameplay هو حركتك و استغلالها بشكل كبير في وسط الخرايطاللي التصميم بتاعها اكتر من ممتاز و تقريبا انا مشوفتش اي خريطة اتسببت انها تبقي مصدر ازعاج ليا.
لو عرفت تتخذ قرار بشكل صح انك تستغل حركتك في مكان معين وسط الخريطة هتعرف انك تنهي اي معركة لصالحك. و اللعبة بيكون ليها اسلوبها الخاص علي عكس اي لعبة تانية. و استغلال حاجة زي الحركة و التنقبل بالباركور بيدي متعة للعبة مش موجودة في اي لعبة تانية. و يمكن فكرتني شوية باستغلال فكرة الحركة و التنقل اللي كانت موجودة في لعب Arena Shooters قديمة زي Unreal Tournament و Quake 3.
من ناحية الاسلحة اللعبة قدمت مجموعة اسلحة متقسمة بالشكل المعتاد زي DMR’s ,Pistols ,Assault rifles, SMG’s و من كل تصنيف 3 اسلحة او سلاحين مثلا. في الاصدار النهائي طبعا في شوية اسلحة جديدة و كمية الاسلحة ولا هي قليلة قوي ولا هي كتيرة اوي و كيماتهم كانت اول خطوة في ان الاسلحة في اللعبة متوازنة بشكل كبير. كل سلاح بتلاقي فيه ميزة و عيب بيخلو فيه توازن مع الاسلحة التانية يعني في سلاح زي Hamlock BFR مثلا بيخليك تعرف تتعامل بشكل مناسب في الاماكن الضيقة, بس متقدرش تقدم اداء كويس زي الـCarbine علي المسافات البعيدة.
و كمان نفس الكلام بيبقي بيبقي مع ال Perks و تعديلات الاسلحة في اللعبة. الـ Sniper Rifles مش بتقدم مساحة لانك تقدر تعمل شوية حجات موجودة في لعب تانية زي الـQuick Scoping. هنلاقي الاسلحة دي بيتلعب بيعا بشكل تقليدي جدا و محتاج انك تبقي واقف في مكان مش بتتحرك منه عشان تعرف تستخدمها.
الحاجة اللي ممكن يكون عليها جدال هي الـ Smart Pistol. اللي انا شخصيا من خلال البيتا حسيت انه سلاح Overpowered. السلاح الصراحة مستفذ في حالتين و هما لو انت جربت تستخدمه هتلاقي انه لازم تحط الهدف وسط مربع او Raticle عشان تعرف تموت حد بيه, و لو طلع لجزء من الثانية هتحتاج تعمل لوك عليه تاني. و الحالة التانية هيبقي لو انت مت منه و دي مش محتاجة شرح انك مت من سلاح فيه زي Aim Bot. الفكرة ان السلاح احتمالية وجود شخص بيلعب بيه في الجيم و اللي هي كبيرة شوية بتجبرك انك تعد تحرك و تتنقل من مكان لمكان عشان متبقاش هدف سهل لاي اي حد يلوك عليك بسهولك و يموتك. يعني انا شخصيا مش همانع لو بس ينزل ابديت يقلل مساحة الراتيكل بتاعت السلاح او يزود اللوك تايم شوية.
الجانب التاني في الجيمبلاي و هو الـ Titans.
و اللي لقيت من خلاله توازن اكتر من ممتاز مع نوعين الـ Titans الجداد و هما Stryder و Ogre و اللي بتفتحهم لما بتدخل الــMultiplayer Campaign.
التوازن بيتم من خلال سرعة كل تايتن و قوة الدرع بتاعه و القدرة الخاصة بيه و طريقة تدمير اي تايتن ادامه بايده. و الصراحة وجود تايتن رابع في المعادلة دي معتقدش هيكون ليه اي لازمة عشان هيضر التوازن جامد. و طبعا التوازن بين الاسلحة بتاعت التايتنز ممتاز زي الاسلحة العادية.
استخدام التايتنز في الللعبة محتاج منك تعرف ازاي تستغل قدراتهم صح و تعرف تعمل حساب نقط ضعفهم. يعني زي ما مثلا تستغل سرعة الStryder في انك تعمل Flank لاي حد بس تعمل حساب ضعف الدرع بتاعه. المواقف بقي اللي بيبقي فيها تايتن ضد اي حد عادي هي كمان متوازنة لو انت عرفت تتعامل صح. التايتنز تقدر تتعامل معاهم عن طريقال Anti Titan Weapons اللي معاك او انك تركب فوقيه و CPU core بتاعه.
او انك تعمل هاك للمدافع اللي متوزعة في الماب اللي ممكن متخليش اي تايتن يعرف يقرب من المنطقة اللي حواليها و طبعا لابد من استغلال طرق الحركة وسط الماب.
اللعبة بتقدم حاجة انا بعتبرها تطوير لفكرة الDeath Streak من سلسلة Modern Warfare و هي الـBurn Cards. هاتلقوها معمولة بطريقة تحسسك انك معاك كروت لعبة زي Magic the Gathering و الصراحة طريقة التقديم دي عظيمة. الـBurn Cards انت ممكن تختار 3 منهم قبل كل ماتش بتختار واحد منهم يشتغل مع اول الجيم او بعد لما تموت و لو مت طبعا هتلاقي ان مفعول الكارت بيروح.
الكروت بتقدم مزيا زي انه يديلك سلاح معين بشكل اقوي شوية, او تعديل يخليك تجري بسرعة و مزايا اضافية تانية بتبقي زي Perks مؤقنة بتساعدك شوية تعوض اي خسارة لو مت او انك تقدر تاخد افضلية مع فريقك في اول الجيم مثلا.
شخصيا كان عندي امنية لو يبقي تبادل للكروت دي مع صحابك جوة اللعبة, طبعا في نقطتين الناس قلقو منها و اول واحدة هي الـBots. كل جيم بيبقي معاك و ضدك Bots في ناس قالو كده اللعبة ممكن تبوظ, الصراحة البوتس في زي ال Minions في League of Legends. بيساعدوك تعمل تجميع للBuilding Time بتاع التيتان اللي معاك. ذكاء البوتس محدود جدا و ملوش اي تاثير عليك و مجرد ان بيديلك شالنجيز انك مثلا تقتل 50 بوت عشان تفتح حاجة لسلاح مش اكتر و مش هيبقو حاجة اساسية تعتمد عليها في الـLevel Up. و مش هياثروا علي ان حد يبقي احسن من التاني.
تاني حاجة مسألة بقي ان اللعبة 6 ضد 6, العدد كفاية اوي عشان لو 5 اشخاص من ال12 نزلو التايتنز بتوعهم هتبقي العملية فوضي. خصوصا لو الناس بتلعب هارد بوينت و قامت خناقة علي بوينت معينة و اللي عاوز يشوف مثال عملي يلعب Last Titan Standing و لما التايتينز يخشو في مواجهة وجها لوجه ايه اللي بيحصل.
الـNetcode بقي و ده تقريبا من الحجات المهمة مع لعبة زي دي, بتبقي فيهعا جيمبلاي سريع جدا و محتاج Netcode دقيق جدا جدا و مش طالبة يكون فيه اي مشكلة. بنسبة 95% الـNetcode في اللعبة دي مفهوش اي مشكلة بس نادرا ما بيحصل شوية مشاكل صغيرة في كام طلقة مش بيتسجلوا او Melee Attack بيجي بشكل غريب.
اخر حاجة بقي عاوز اتكلم عنها و هي حتة التعاون اللي موجودة في اللعبة دي مع بعض الجيم موودز زي هاربد بوينت او كابتشر زي فلاج, اللعبة مفهاش عناصر Team Work زي باتلفيلد مثلا. بس بتجبر بشكل كبير عشان تكسب و ده الهدف الاساسي اللي المفروض اي حد يفكر فيه ان لازم تتعاون مع صحابك و تبقي علي اتصال معاهم طول الوقت . الجيم موودز صحيح في اللعبة تقليدية ولا هي حجات ثورية و مختلفة.
و افكارها زي Domnation و Capture the Flag و Team Deathmatch. بس استغلال فكرة الحركة وسط الخريطة و الباركور و التيتان جيمبلاي مع حتة التعاون في اللعبة الصراحة يمكن يكون دا السبب الرئيسي بالنسبالي لادمان لعبة زي دي.
تعالو اديلكو مثال في جيم موود Capture the Flag بنوزع الادوار ان واحد يروح ياخد العلم و وراه واحد بتايتان و يستحسن يكون Stryder عشان سريع جدا و يا سلام لو الـ Dash Core شغالة كمان. هاخد العلم و اطلع علي ضهر التايتن و نهرب علي العلم بتاعنا. دا مثال بسيط و طبعا لو اتعملت فينا حركة زي دي. بيبقي في زي اساليب مضادة بأن احنا نستخدم الArc Mines. نركب فوق التياتان ندمر السي بي يو كوور بـC4 و افكار تانية كتير.
باختصار اللعبة دي ممتعة بشكل عظيم مشوفتش زيه من فترة!
الجرافيكس:
احنا لعبنا اللعبة علي PC بس فا معظم النقط اللي هتكلم عنها دلوقتي متركزة علي نسخة البي سي. اللعبة الصراحة متعتبرش لعبة محتاجة جهاز قوي جدا عشان يشغلها. و ممكن اجهزة متوسطة تشغلها كويس.
مستوي الTextures و شكل الانفجارات و الناحية التقنية في اللعبة الي حد كبير كان حلو جدا بس مش حاجة يعني الخارقة و جرافيكس الـNext Gen اللي تنافس لعبة زي Battlefield مثلا. و اعتقد دي حاجة كويسة شوية عشان توازن بين الاداء بتاع اللعبة و تحاول تديلك Frame Rate مناسب. و يبقي مناسب لردات فعلك وسط اللعبة و يحسن منها.
الاضاءة في اللعبة هي اللي حلوة جدا الصراحة و في كذا خريطة زي Angel City بتبقي الاضاءة فيها الصراحة عظيمة. تصميم الصراحة هو اللي عظيم كل خريطة ليها الاحساس و البيئة بتاعتها و اماكن بتوظف الباركور بشكل عظيم. و نفس الكلام مع تصميم الاسلحة و التايتنز اللي متحسوش انه مش مستقبلي اوي.
اللعبة علي البي سي فيها حاجة بعض الناس بتشتكي منها و هي غريب شوية الصراحة ان اللعبة متحديدة علي 60 فريم مهما كان البي سي بتاعك خارق مش هيعدي الحد ده تماما .و مع ان اللعبةمتحددة علي 60 فريم بتلاقي مع قفل الـVsync شوية Screen Tearing. و مع فتح الVsync بيحصل Input Lag.
شخصيا لقيت يعني حل مش نهائي و سعات يشتغل و سعات لا, انك تقفل الـVsync من اللعبة و تفتحه من الـ Control Panel بتاع كارت الشاشة عندك. بس حسب كلام Respawn علي تويتر في ابديت ممكن ينزل يحل المشاكل دي و الحد بتاع الفريم ريت يعلي شوية.
الاصوات:
لعبة زي تايتن فاال مع كمية الاكشن و الدوشة و الهرج و المرج اللي بيحصل وسط الجيم مع كمية التايتنز و كمية الاسلحة و الانفجارات الاصوات فيها اهتمام بتفاصيل و التوازن بتاع الاصوات دي في وسط كل ده ممكن تميز اصوات الاسلحة. ممكن تعرف لو حد قريب منك بيستخدم انهي سلاح DMR ولا Smart Pistol و لا في Titan بيستخدم 44 Mm Canon ولا Laser Railgun.
الاصوات في اللعبة الصراحة عظيمة كمان اللعبة مع انها مقدمتش موسيقي متنوعة بشكل كبير بس في وسط الجيم و خاصة مع الprelude اللي في اخره بتلاقي المزيكا بتدي زي احساس عظيم بعيشك اللحظة المفروض تهرب فيها او تحاول تقضي علي التيم اللي ضدك كله لو كنت انت اللي كسبان.
في مشاكل سعات بتحصل نادرا في الصوت ان بيحصل تقطيع خفيف بيخلي الصوت سعات يختفي و يرجع تاني عادي.
الحكم النهائي:
اجابة بقي علي السؤال اللي سالته في الاول بخصوص هل Respawn قدموا اخير تجربة الـMultiplayer Shooter اللي تخلينا نشوف حاجة جديدة و مختلفة عن اللعب اللي عمالة تكرر نفسها في الفترة الاخيرة دي?? و اللي يا ريت بتكرر نفس المستوي بالعكس دي بتقل سنة ورا التاينة.
الصراحة Titanfall قدمت تجربة عظيمة الواحد مشفهاش بقاله فترة الواحد في الفترة اللي فاتت ادمن اللعبة بشكل فكرني بادمان Halo 2.
و رجعت الواحد لايام الـMultiplayer Arena Shooters المحترمة زي Unreal Tournament و Quake. و عملت توازن عظيم بين نوعين جيمبلاي مختلف سواء للـ Pilots او الـ Titans.
اللي عنده Xbox one من الضروري انه يجيب اللعبة دي لانه من النقط الايجابة في صالح الكونسول ده انه عليه Titanfall بشكل شبه حصري. اي بي سي جيمر بيحب الـMultiplayer Shooters ضروري انه يلعب اللعبة عشان هيشوف تجربة جديدة و مختلفة عن اي Multiplayer Shooter لعبها قبل كده.
