ستوديو Milestone بيقدملنا MotoGP جديدة و من الواضح جدا إنها فيها تغيرات كتيرة مقارنة بالأجزاء السابقة.
كالمعتاد, اللاعبين ممكن يلعبوا في Seasons الخاصة بـMotoGP, Moto 2, و Moto 3. في MotoGP 15 عندك القدرة إنك تعمل فريق السباق الخاص بيك. الميزة ديه متوفرة في Career Mode وبتسمحلك إنك تبدأ من ادنى الترتيبات.
لازم تشتغل جامد في اللعبة ديه وتبذل مجهود عشان تكسب سباقات و تكتسب راعين جداد. إنت بتستقبل Skill Points على حسب أدائك في سباق. النقاط ديه ممكن تستخدم في شراء دراجات نارية جديدة أو تعلي الدراجة بتاعتك.
اللعبة مش كلها Career Mode بس, في Multiplayer. في الجزء ده Multiplayer بيدعم لحد 12 لاعب في نفس الوقت و بيبقى شغال كويس جدا, كلعادة ساعات بيبقى في Lag. و من أحلى المميزات إن في Split-screen.
التحكمات في اللعبة واقعية جدا, و ده معناه إن اللعبة مش سهلة قوي و صعبة شوية. كلاعب جديد هيبقى في شوية أساسيات هتتعلمها و اللعبة هتظبط معاك. اللعبة بتعتمد عالمهارة جدا, فلازم تتعلم كويس جدا عشان تقدر تبقى كويس في سواقة الدراجات. اللعبة بتقدم امكانية إنك تشوف السباق اللي إنت لسة مخلصه frame-by-frame بمعنى إنك هتشوف كل حاجة بالتصوير البطيء وتمشي خطوة خطوة وتشوف إنت عملت إيه بالظبط في سباق وتشوف غلط إزاي, وإزاي تصلح كده قدام.
رسومات اللعبة أحسن شوية مقارنة مع MotoGP 14. المسارات, الدراجات, الاضاءة, و الطقس والبيئة شكلهم حلو, ولكن مفيش مقارنة كبيرة قوي مع الجزء اللي فات.
الـAnimations حلوة جدا و هتديك احساس إن إنت في سباق حقيقي فعلا. الحاجة اللي ابهرتني جدا هي تأثيرات الطقس على الدراجة و السواق.
الصوت في اللعبة جيد و واقعي في معظم الوقت, ولكن في بعض الأوقات صوت الدراجة بيبقى وحش جدا. بعض الأصوات بتبقى زي الدبان الغلس بتاع الصيف.
الحكم النهائي:
اللعبة كويسة, ولكن هي مش فرق كبير عن MotoGP 14. هل إنت عايز تدفع تمن كامل لـMotoGP 15؟ أنا من رأي لأ . لو عندك MotoGP 14, ممكن تكبر من الجزء ده أو تشتري MotoGP 15 لما ترخص شوية.
الكلام اللي أنا كاتبه فوق ده نصيحة فقط لو إنت عندك MotoGP 14. لو ملعبتش 14 ومش عندك, فـ أنا بنصحك تشتري MotoGP 15. السباقات كويسة جدا, و Graphics كويسة, و Replay Value ممتازة, و Multiplayer في معظم الاوقات ممتع .
