أخبار و مراجعات ألعاب الفيديو

مراجعة لعبة Sid Meier’s Civilization VI

SHARE
, / 443
مراجعة لعبة Sid Meier’s Civilization VI

هى واحدة من أشهر سلاسل الألعاب الأستراتيجى اللى ليها عدد كبير من الجماهير اللى بيحبوا النوع دا من الألعاب و اللي بدأت فى أول جزء منها عام 1991 على يد Sid Meier و Bruce Shelley وبعد كدة صدر منها العديد من الأجزاء و أخرها Civilization VI اللي نزلت يوم 21 أكتوبر الماضى على الويندوز و يوم 24 أكتوبر على الـMac . وطبعا اللعبة من تطوير أستوديو Firaxis Games و تم نشر اللعبة بواسطة 2K Games و توزيعها من قبل Take- Two Interactive.

و الهدف من اللعبة طبعا زى معظم ألعاب الأستراتيجى هو انك تبنى أعظم حضارة فى التاريخ و أنك تفوز باللعبة عن طريق القوة العسكرية او التفوق العلمى او العلاقات الدبلوماسية او الثقافة.

الجيمبلاي:

طبعا اللعبة زى ما قولنا انها من ألعاب الأستراتيجى اللى قايمة على الأدوار و اللعبة بتحاكى تاريخ الأنسانية من حيث المعرفة, التطور العلمى و الدينى و الثقافى و العسكرى كمان.

كل مدينة موجودة بتحتوى على عدد من الحقول ودى اللى بتحاول على قد ما تقدر انك  تحصل على أفضل أستغلال لكل حقل منهم عشان تستفيد بطبيعة الأرض الموجودة عليهم سواء كانت زراعية او ملبئة بالتلال او بجانب نهر او ساحلية, و عندك عدد من الاختيارات عشان يبنيها على الحقول اللى موجودة عندك سواء كان الاختبار انك تبنى مزرعة عشان توفر طعام للسكان فى المدينة او منجم عشان تزود سرعة البناء  او حقل بترول. دا غير ان عندك عدد من “المناطق” او “الاحياء” و دى ممكن تقول عليها زى “الكمبوند” زى مثلا مساحة حقل معين بتستغلها عشان تبنى فيها كل الابنية العلمية زى المكتبة, الكلية, المدارس و المعامل و زى المنطقة الصناعية ودى اللى بتبنى فيها المبانى اللى بتزود انتاجك زى الورش و المصانع و مفاعلات الطاقة.

طبعا انت فى اللعبة بتبنى عاصمة دولتك و بعد كدة بتبنى مدن جديدة أو بتغزو و تحتل المدن اللاعبين الأخرين و توسع من مساحة امبراطوريتك. وطبعا فى عجائب كتيرة جدا فى اللعبة سواء صناعية زى Stonehenge و Pyramids و Hanging Gardens أو طبيعية زى مثلا Dead Sea و Mount Everest. و المميز فى موضوع العجائب دا أن معظم العجائب سواء كانت مبانى ( صناعية) أو طبيعية دى بيبقى لها تأثير خاص زى مثلا الأهرامات لما بتبنيها بتديلك عامل أضافى و كمان بتزود عدد الحقول اللى العامل ممكن يبنيها ودا طبعا بيقلل العبء من عليك على المدى الطويل فى انك متضيعش وقت فى انك تنتج عمال كثير و تستفيد بعدد الادوار اللى ممكن تبنى فيها العمال فى انك تبنى حاجة احسن, بس طبعا لازم تخلى بالك ان زى ما انت تقدر تبنى العجائب دى كمان كل اللاعبين يقدروا يبنوها طالما وصلوا للتفوق العلمى اللى يسمحلهم انهم بينوها و عشان كدة ممكن تلاقى وانت بتبنى واحدة من العجائب دى ان احد اللاعبين خلصها قبلك و بالتالى كل الأدوار اللى استمريت فى بنائها تعتبر ضاعت لأنك متقدرش تبنى نسخ من العجائب, لأن كل العجائب دى منها نسخة واحدة لو حد تانى بناها انت متقدرش تبنيها.

وطبعا فى طرق كتير جدا عشان تتفوق فى اللعبة سواء عن طريق انك تكون امبراطورية عسكرية او متفوق علميا او ثقافيا او حتى دينيا او دبلوماسيا. ودى طرق الفوز فى اللعبة, و بيبقى عندك مئات الاختيارات سواء للبحث العلمى عشان تكتشف تقنية معينة  زى مثلا Mining و اللى من غيرها متقدرش تبنى مناجم أو بالنسبة ل وانت بتختار اللى انت محتاجه فى الوقت ده و ممكن فى اى وقت تغير

طبعا فى هناك اسس للتمدين واللى بتحاول تكتشفها مع البحث العلمى بحيث انهم يكملوا بعض عشان تحقق اكبر قدر من النمو فى الطريق اللى انت بتختاره.

الدبلوماسية مهمة فى اللعبة لان طريقة تعاملك مع الحضارات و الامبراطوريات الاخرى بتتغير مع مضى الوقت و ممكن مع اكتر من اختيار خاطئ انك تخلى الحضارات التانية تعلن الحرب عليك لانك مثلا بتبنى قريب منهم او  عشان عندك عجائب اكثر منهم بس الأهم من كدة انك ممكن تعمل تحالفات دبلوماسية ودى طبعا بتبفى مهمة خصوصا لو اتحالفت مع أمبراطورية قوية فيبقى احتمال اقل ان امبراطورية اضعف منها تعلن الحرب عليك لانها هتبقى خايفة من حلفائك.

الدين مهم جدا فى اللعبة و يمكن يكون واحد من النقط اللى معجبتنيش فى اللعبة لانه فى هناك تركيز كبير جدا عليه خصوصا مع الأضافة الجديدة فى الجزء دا أنه اصبح من الممكن ان تعلن الحرب مثلا عشان فى لاعب اخر حول واحدة من المدن بتاعتك الى دين مختلف وبالتالى اصبحت الحروب الدينية كتير جدا فى كل لعبة ومعظم اللاعبين بيعلنوا الحرب بالطريقة دى لانهم لو اعلنوا حرب عادية بياخدوا نقط للتحريض على الحرب ودى بتخليك مكروه لانك تعتبر “مروج للحروب” ولو دا حصل اكثر من مرة ممكن تلاقى كل اللاعبين فى الخريطة بيعلنوا الحرب عليك.

بالنسبة بقى للدول و الرؤساء, اللعبة حاليا فيها 19 حضارة مختلفة و 20 قائد ( لأن الامبراطورية الرومانية لها قائدين ) وكل حضارة بيبقى ليها نقاط قوة ودا اللى انت بتبنى عليه خطتك فى انك عاوز تخلص اللعبة ازاى, يعنى مثلا مصر فى اللعبة عندها نقط بتخليها افضل حضارة لو عاوز تبنى الكثير من العجائب, فى حين انك لو عاوز حضارة تهدف للتفوق الدينى هيكون الافضل انك تلعب بالعرب او اسبانيا او الهند. يعنى نقاط قوة ممكن تستغلها فى انك توصل للهدف دا لانها بتبقى معظم الاحيان افضل من غيرها, بس دا بيعتمد على ازاى هتأسس عاصمتك و مدنك و البداية اللى هتحصل عليها.

اللعبة بتدعم نظام اللعب المتعدد ( المالتى بلاير)  وبصراحة انك تلعب مع ناس متعرفهوش فى الجيم اللى بيبقى فيه كل حاجة راندوم بيبقى جيم كويس جدا لان كل واحد بيحاول انه يحسن استغلال الحضارة اللى بتطلع من نصيبه.

الأصوات و الجرافيكس:

الموسيقى فى اللعبة جيدة الى حد ما, فى مقطوعات حلوة جدا زى المقطوعة الرئيسية Sogno di Volare, و يمكن الجرافيك فى الجزء الجديد أختلف كليا عن الجزء السابق, وبصراحة انا محبتش الاختلاف دا فى الاول بس بعد اول ساعة او ساعتين اتعودت عليه وفعلا بدأت أحس انه أفضل من الجرافيك فى الأجزاء السابقة بالأضافة إلى التحديثات التى تمت أضافتها لواجهة المستخدم.

التقييم النهائى:

لعبة Civilization VI واحدة من أفضل ألعاب الأستراتيجى اللى لعبتها السنة دى و اللعبة بتتميز بكثرة الاختيارات و المرونة و تعتبر خلاصة الاضافات و التحسينات الى مرت على سلسلة civilization بأكملها خلال ال25 سنة اللى فاتوا و اللعبة ممتعة فعلا بس محتاجة لعدد ساعات كبير جدا عشان تقدر تطور استراتجياتك عشان تفوز اكتر,  يمكن الحاجة الوحيدة اللى معجبتنيش فى الللعبة هى ان هناك تعسف فى استخدام الدين كعذرللهجوم كثير جدا فى اللعبة بس غالبا هيصدر تحديث للعبة يقلله.