SK Productions News Center

اشاعة : لعبة Destiny 2 هتتخلي عن جزء كبير من افكار الجزء الاول و هتنزل للـPC

لعبة Destiny 2 هي معروف انها في خطط Activision و Bungie لاصدارها في 2017 و لكن لسة لم يتم الإعلان عنها , و حسب عدة مصادر مختلفة  اللعبة هتصدر علي الجيل الحالي بالاضافة للـPC , مهملة تماما الجيل القديم زي ما حصل في اخر اضافة و هي Rise of Iron , و بكده هيكبروا قاعدة المعجبين للعبة , بالاضافة ان اللعبة هتكون تجربة جديدة تماما و مختلفة , فيما معناه ان الشركة غالبا هتتخلص من الشخصيات و الاماكن القديمة.

الإشاعة ظهرت لأول مرة علي Neo Gaf  من واحد اسمه Benny_a , قال ان صديق ليه موظف في Activision كان في اجتماع داخلي للشركة و قالوا التفاصيل دي , و قال برضو ان في استوديوهات تابعه للشركة زي Vicarious Visions هتشارك في تطوير الجزء التاني بالاضافة ان كان في مصادر اول السنة قالت ان اللعبة هتكون في اخر 2017 و هتستهدف قاعدة معجبين اكتر عشان كدة هتتوجه للحاسب الشخصي .

شركة Bungie عايزة الجزء يكون محترم و يرجع ثقه الناس في السلسلة مرة تانية , حتي لو ده علي حساب رمي كل البيانات القديمة للقصة , و المصدر الي قال كده شبه الموضوع بلعبة Diablo 2 الي اقتبست حاجات صغيره بس من الجزء الاول , و غيرت حاجات كتير عليه , لكن الكلام هنا اقرب لأن اللعبة تبدأ من الصفر , بحيث ان اضافة Taken King كانت مجرد تصليح بسيط , لكن الجزء الجديد هيكون بمثابة تغيير جذري .

اللعبة هتغير اسلوب اللعب عن الجزء الأول , خصوصا انهم ناويين يكون في حيوية في الجوانب الي موجودة فالكواكب و الاماكن الي بتزورها بالرغم من ان غالبا محدش هيقدر يستخدم شخصيته القديمة في اللعبة , الا ان الشركة بتفكر تكافيء الناس الي لعبت كتير

في شهر ابريل الماضي الشركة اعادت تنظيم المطورة , و الناس الي اشتغلت علي Taken King و هم Luke Smith و Mark Noseworthy هيبقوا هم الي ماسكين تطوير اللعبة بشكل كبير. و بكده تقريبا اكتر من 750 شخص من Bungie , و استوديوهات من Activision زي Vicarious VIsion و High Moon شغالين علي اللعبة