أخبار و مراجعات ألعاب الفيديو

ستوديو Naughty Dog مش متأكد من اتجاه الاضافة الخاصة بـUncharted 4

SHARE
, / 121

خلال مقابلة مع GameSpot, مدير اتصالات الستوديو Arne Meyer قال تفاصيل أكتر عن الاضافة القادمة لـUncharted 4, واعترف إن الستوديو لسة معرفش هيعمل إيه في الاضافة ديه. من مفترض إن الاضافة ديه هتضيف على قصة اللعبة.

Meyer قال التالي

أنا كنت بتكلم مع Neil *مخرج اللعبة* من شهر كده لما تم الكشف عن إن هيبقى في اضافة و  شوفنا رد فعل الناس, وكان رد الفعل مثير لأن الناس بتفكر إن احنا ممكن نشيل من القصة و نحطها في اضافة مثلا. ولكن Neil قال “أنا معنديش أي فكرة احنا هنعمل إيه في الاضافة ديه. احنا مشغولين جدا على اللعبة ذات نفسها”. و لما كنت بكلمه قلتله احنا بناخد مخاطرة كبيرة هنا لأن احنا مش عارفين هنعمل إيه لحد دلوقتي. احنا التزمنا إن احنا ننزل الاضافة ديه و لازم تبقى مستواها عالي الجودة و قصتها متفاعلة جدا وممتعة, واحنا قلنا إن ده آخر فصل في قصة Nathan Drake. معانا كل ده ولازم نوصل لنقطة ولكن احنا معندناش فكرة عنها حتى الآن.

Neil لسة مفكرش أصلا عن قصة الاضافة الخاصة بـSingle-player. وزي ما هو واضح احنا معندناش حتى المصادر الكافية عشان نشتغل على الاضافة ديه لأن الكل شغال على اللعبة حاليا. احنا كل اللي عارفينه عن الاضافة إن احنا هنعملها وبس.

 Naughty Dog وضحت قبل كده إن Uncharted 4: A Thief’s End هتبقى الفصل الأخير في قصة Nathan Drake.

الستوديو كان اشتغل على اضافة قبل كده وهي The Last of Us: Left Behind, ولكن مفيش أي حاجة واضحة عن إيه اللي هيبقى متوفر في الاضافة الخاصة بـUncharted وإيه اتجاه الاضافة ديه و هتاخد Uncharted 4 لفين.

الموضوع ممكن يبقى مقلق لما تسمع اللي هقوله من بعيد, ولكن احنا حاليا معندناش خطة ضخمة أو حاجة زي كده, مفيش حتى فكرة كبيرة جدا عن اتجاه الاضافة ديه خالص. احنا بنعامل كل لعبة بنفس مستوى الأهمية و نطور اللعبة بطريقة جديدة و فريش كل مرة. احنا دايما بنقول لنفسنا و احنا في مرحلة ما قبل الانتاج, إن احنا بنحاول نعرف إيه اللعبة اللي عايزين نعملها هنا. هل هنكمل السلسلة ديه ولا لأ؟ لو اللعبة مفيهاش احساس التجديد و في احساس إن مفيش قصة كويسة تتقال هنا, مفيش أحساس إن هنقدر نجرب حاجات جديدة أو نطور Gameplay, فـ بنبدأ نفكر إن احنا نبعد عن المشروع ده. كل مرة الموضوع نجح و قولنا تمام جدا في قصة نقدر نقولها هنا.

دلوقتي احنا بننتقل إلى PS4 و نقدر ناخد كل اللي اتعلمناه من الثلاثة الأجزاء اللي فاتوا ونطبقه هنا و نطوره و نبص على الأتجاه اللي تم اتخاذه في قصة الأجزاء ديه, فـ حاليا الموضوع تحسه طبيعي إن ده وقت إن احنا نبعد عن السلسلة ديه. ديه كانت حاجة احنا ادركناها في أول مراحل تطوير اللعبة إن خلاص ده الوقت المناسب إن احنا نخلص السلسة.

Uncharted 4: A Thief’s End هتنزل على PS4 في 18 مارس, 2016.