الالعاب اللي بنقول عليها Double A او اللي هي الالعاب اللي بتكون تجربتها صغيرة و ميزانيتها متوسطة او اقل دي نوعية العاب معدش في منها كتير في الجيل الحالي و بقي في فراغ ضخم بين العاب Triple A بانتاجية ضخمة و اغلبها مركز علي الجانب التجاري منها و بين الالعاب المستقلة الصغيرة.
يمكن في امثلة بتيجي من حين لاخر زي لعبة Hellblade اللي نزلت السنة اللي فاتت و حققت نجاح كبير و اثبتت نفسها كمثال ناجح للعبة Double A
شخصيا كنت منتظر السنة دي لعبة من نفس التصنيف و هي Vampyr اللي بتيجي من المطور الفرنسي Dontnod اللي سبق انه قدم لينا تجارب زي لعبة Remember Me و Life is Strange و مع متابعتي لحملة دعاية اللعبة اتردد بيني و بين نفسي سؤال هل Vampyr هتقدر انها تحقق معادلة الالعاب الـ Double A صح بانها تكون لعبة بافكار بسيطة و ممتعة و متحملش نفسها اكبر من طاقتها ولا لا ؟؟
